Kull 21 på Nynorsk avissenter er ferdige med opplæringa i Førde. Over nyttår startar dei i praksis i fem ulike aviser.
– Fredag 15. desember var ein røff dag, og ein veldig kjekk dag. At dei fem praktikantane som vi er blitt så godt kjende med, så glade i, og som no fungerer som fullskala journalistar har sin siste dag, gjorde det til ein røff dag. At vi fekk fine avslutningar i Firda og felles julebord på kvelden gjorde det til ein kjekk dag, seier dagleg leiar i avissenteret, Ingunn Osland.
Hit skal dei i praksis:
To av praktikantane reiser til Oslo for å gjennomføre ekstern praksis. Pernille Ekornrud Grøndal skal til Dag og Tid. Emil Askvik Hosøy skal ha praksisen sin i Klassekampen.
Også Jostein Fagerland søker mot byen. Han skal til Bergen og ha praksisen sin i Bergens Tidende.
Ronja Årskaug Vallestad og Marie Olderkjær satsar på lokalaviser. Ronja skal til Sogn Avis, og Marie til Bø Blad.
Vi i Nynorsk avissenter ønsker lykke til.
Travle dagar
Dei fire månadane dei fem praktikantane i kull 21 har vore i Førde har vore intense, travle og gode. Alle dei fem har levert mange, ulike og godt lesne saker til Firda. Dei fleste er publiserte, men nokre av dei er sparte til jul.
– Den siste veka har vore veldig travel, med ferdigstilling av saker, og avslutningar. Men det har vore ei god veke, både for oss som jobbar på avissenteret og for praktikantane. Vi kjem til å sakne alle fem. Som personar. Som gruppe. Som journalistar. No sender vi dyktige journalsitar vidare til andre aviser, og kjenner oss trygge på at dei er rusta til å møte det som ventar. Lykke til!, seier Osland.
