Ein månad ut i løpet er haustens praktikantar begynt å bli varme i trøya – og produserer saker for Firda på løpande band.
Dei er også blitt kløpparar på å lage video.
Ingeborg og Josefia sin video om innskrenka russetid har fått uventa mykje merksemd på TikTok, der den i skrivande stund har nesten 140.000 visningar.
– Eg har gått viralt, seier Ingeborg Bjørke.
I videoen intervjuar ho elevar på Førde vgs. om ni dagars russetid, som fylkeskommunen foreslår frå 2027 av.
– Veslesøstra til eksen min hadde plutseleg sett meg på TikTok. Eg fekk også melding av ei venninne som hadde sett meg, seier Ingeborg, som var reporter i videoen.
I den andre enden av mediespekteret: I tysdagens papiravis dekorerte dei både fram- og baksida. Dei hadde seks saker i ei og same avis, om alt frå næringsliv og kultur til russetid.
– Det er kjekt å sjå avkastning allereie etter fire veker, seier Josefia Longva Danielsen.
Praktikantopplæringa har mange kurs dei første vekene. I neste fase består dei fleste dagane av praksis i avisa Firda, med eitt og anna kurs innimellom. Det merkar både avislesarane og redaksjonen godt, med flust av nye «bylines» som dukkar opp på nettavisa og i den fysiske blekka.
Her er sakene som praktikantane hadde i tysdagsavisa:
- Russetida blir innskrenka til ni dagar, som elevane ved Førde vgs. reagerer negativt på (Ingeborg Bjørke og Josefia Longva Danielsen).
- Sunnfjording Eirik Folkestad var tett på rakettoppskytinga på Andøya Spaceport (Josefia Longva Danielsen).
- Pensjonistar på Vassenden mistar møteplassen sin når Coop legg ned butikken sin der (Ingeborg Bjørke og Helene Midtbø Bjørkedal).
- Førde får nytt og spesielt nattklubb-konsept, som byr på folkemusikk, diskolys og tekno (Luca Lukas).
- Bruktbutikken Poden & Boden, med base i Førde, opnar sin tredje butikk, i Tromsø (Herman Mortensen).
- Bildeserie frå Teaterfestivalen i Fjaler (Josefia Longva Danielsen, Luca Lukas, Herman Mortensen og Helene Midtbø Bjørkedal).