Kristoffer Solberg Refsnes, Amalie Røstbø, Knut Marius Moen Tjørstad, Ingeliv Aadland og Vilde Ferah Molven har fullført utdanninga. Alle har fått jobb!
28. februar var dei ferdige i Nynorsk avissenter.
Frå Førde reiste dei allereie før jul, og dei siste to månadane har dei vore i praksis i ulike aviser rundt om i landet. Frå 1. mars var dei klare for nye oppdrag.
Og oppdrag har dei fått.
Knut Marius Moen Tjørstad har hatt praksis i Sunnmørsposten. Etter praksisperioden har han fått jobb som tilkallingsvikar i avisa fram til sommaren. Då skal han ha sommarjobb i same avis.
Vilde Ferah Molven skal ta praksisen sin i mai og juni. Årsaka er at ho har fått praksisplass i Svalbardposten, og dei hadde ikkje moglegheit til å ta mot praktikantar før. Ho blir ein av dei første som skriv nynorsk i Svalbardposten. Vilde held fram i sommarjobb etter praksisperioden.
Kristoffer Solberg Refsnes har hatt praksisen sin i Nationen. Han har no fått eit 7 månader langt vikariat i Sogn Avis, og startar der 1. april.
Ingeliv Aadland har hatt praksis i Nynorsk pressekontor. Ho har fått jobb som tilkallingsvikar i Sogn Avis fram til sommaren. Ho har også fått sommarjobb i same avis.
Amalie Røstbø har hatt praksis i avisa Sunnhordland. Ho kjem til å halde fram i eit mindre vikariat i avisa denne våren, medan ho fullfører eit universitetsfag. Til sommaren blir det full rulle med journalistikk igjen, i første omgang med sommarjobb.