31 år gamle David Sviland får skryt frå politisk redaktør Berit Aalborg: – David er iderik og har ei god forståing for avisprosjektet Vårt Land.
Slik presenterer fagbladet Journalisten at David Sviland no går frå prosjektstilling til fast stilling som debattjournalist i Vårt Land.
Politisk redaktør Berit Aalborg, som har redaktøransvar for debattredaksjonen i Vårt Land, seier dette i ei pressemelding:
– David har, saman med debattleiar Dana Wanounou, bidratt til å løfte kvaliteten på Vårt Lands debattjournalistikk og få inn fleire nye stemmer. Dette har gitt betydeleg vekst i talet lesarar av debattstoffet i Vårt Land.
David er iderik og har ei god forståing for avisprosjektet Vårt Land. Han har bidratt til at debattredaksjonen har sett dagsorden mange gonger, gjennom å finne fram til viktige stemmer i religions- og samfunnsdebatten. Eg er strålande fornøgd med å ha David med på laget, seier Aalborg.
David Sviland kom til Nynorsk avissenter og kull 11 hausten 2018. Han hadde då arbeidd som lærar i Oslo, men kjem opphavleg frå Sviland innanfor Sandnes i Rogaland. Han har mastergrad i nordisk litteratur og var ei tid medredaktør i Litteraturtidsskriftet Kamilla. Han hadde også skrive for magasina Erlik Oslo og På Stranda før han kom til Førde. Praksisplass fekk han i kulturredaksjonen i Vårt Land. David fortsette å skrive for avisa i etterkant og vart etter kvart tilsett i prosjektstilling i debattredaksjonen.